Azərbaycan maarifçiləri beynəlxalq konfransda iştirak edib

Haifada “International Bay Conference for Regionality 2025” keçirilib: Azərbaycanın Maarifçiləri ikinci dəfə beynəlxalq platformada

Haifada keçirilən “International Bay Conference for Regionality 2025” bir daha regionun inkişafı, innovasiya və beynəlxalq əməkdaşlıq mövzularını gündəmə gətirərək strateji qlobal dialoq platforması kimi böyük marağa səbəb olub. Haifa körfəzi regionunun iqtisadi, ekoloji və texnoloji inkişaf perspektivlərinə həsr olunan tədbir bu il də dünyanın müxtəlif ölkələrindən yüksək səviyyəli nümayəndələri bir araya toplayıb.

Konfransın əsas müzakirə xəttini IMEC -Yaxın Şərq–Avropa iqtisadi dəhlizinin yaradacağı yeni imkanlar, həmçinin nəqliyyat, iqtisadiyyat, ekoloji davamlılıq, təhsil və texnoloji tərəqqi istiqamətləri təşkil edib. Tədbirdə müxtəlif ölkələrin nazirlik rəhbərləri, investorlar, akademik dairələrin nümayəndələri və innovasiya mütəxəssisləri iştirak ediblər. “Bay of Opportunities” və “NextBay Global” sessiyaları isə təhsil, biznes və startap ekosistemi üçün geniş əməkdaşlıq və tərəfdaşlıq imkanları yaradıb.

Konfransın ilk günü beynəlxalq delegasiyalar üçün ikitərəfli görüşlər, multikultural əməkdaşlıq platforması və geniş şəbəkələşmə proqramı ilə yadda qalıb. Növbəti gün açılış mərasimi, keynote çıxışlar, IMEC-in regional təsirləri barədə panel müzakirələri, təhsil və biznes, liman və enerji dialoqları, həmçinin yekun sessiya ilə konfransın əsas istiqamətləri təqdim edilib.

Qeyd edək ki, Azərbaycan Maarifçilər Assosiasiyası ardıcıl ikinci ildir ki, bu nüfuzlu beynəlxalq tədbirdə iştirak edir. Bu il Assosiasiya təhsil və biznes sahələrini təmsil edən 7 nəfərlik heyətlə konfransa qatılıb. Azərbaycan nümayəndə heyətinin iştirakı ölkəmizin innovativ təhsil modeli, uşaq inkişafı layihələri və maarifçilik təşəbbüslərinin beynəlxalq səviyyədə təqdim olunması baxımından mühüm addım kimi dəyərləndirilir.

Tədbir, həmçinin Azərbaycan nümayəndələri üçün yeni tərəfdaşlıq istiqamətləri, innovativ təcrübələrin mübadiləsi və regional əməkdaşlığın genişləndirilməsi baxımından əhəmiyyətli platforma olub. FOTO