Ağdam Təhsil Səfirimiz Pərvinə Zeynalova

Özünüzü 1 cümlə ilə təqdim edin. Siz kimsiniz?

– Ağdam rayon Ayaz Abbasov adına Qaradağlı kənd tam orta məktəbin kimya və STEAM müəllimi Pərvinə Zeynalova. Şagirdlərini sevən və sevgi ilə öyrədən.

Sizi uğurlu edən keyfiyyətiniz hansıdır? Bu keyfiyyətinizlə hansı uğura imza atmısız?

– Təşəbbüskar, yeniliklərə açıq həmçinin davamlı özünüinkişaf uğur qazanmağıma və məqsədlərimə nail olmağıma səbəbdir.
Müxtəlif yerli və beynəlxalq layihələrə qoşulub müsabiqələrdə iştirak etmişəm. Ən yaxşı müəllim bloqu müsabiqəsinin qalibi olmuşam. SAF 2022 Beynəlxalq STEAM Azərbaycan Festivalında komandamla birgə 2-ci yer tutaraq gümüş medala layiq görülmüşük. Elm və Təhsil Nazirliyinin Təhsildə inkişaf və innovasiyalar üzrə VII qrant müsabiqəsi qalibi olmuşam.

Sizin ilk dərs günü ilə indi keçdiyiniz dərs arasındakı əsas fərq nədir? Bu illər ərzində hansı bacarıqlarınız inkişaf edib?

– İlk dərs günüm 19 il öncə olsa da indiki kimi yadımdadır. İlk olaraq 11-ci sinifə daxil olmuşdum və şagirdlərimlə az yaş fərqi olmasının həyəcanını yaşamışdım. Müəllim olmağın məsuliyyət və ağırlığını dərk etməklə yanaşı müqəddəs bir peşə olduğunu anlamışdım. İllər ərzində şagirdlərlə empatiya qurmaq, onların baxış bucağından baxaraq ona uyğun davranmağı öyrəndim. Fərq yaradaraq öyrətməyi və şagirdlərim üçün nümunə olmağa çalışmışam.

Sizə görə müasir müəllimin bilməli olduğu 3 əsas bacarıq hansıdır?

– Müasir müəllim özünü inkişaf etdirməli, daim yeniliklərə açıq olmalıdır.
Öz ixtisası və tədris etdiyi fənni mükəmməl bilməklə yanaşı yüksək intellektə sahib olmalı və İKT bacarıqlarına yiyələnməlidir.

Sizin pedaqoji fəaliyyətinizdə tətbiq etdiyiniz fərqli metodlar hansıdır?

– Şagirdlərimə öyrənməyi öyrədirəm. Öyrədərək öyrənməyi ən effektiv mənimsəmə üsulu hesab edirəm. Dərs prosesində ən çox istifadə etdiyim metodlar debat, müzakirə və beyin həmləsidir.

“Təhsil Səfiri” olaraq bugünkü təhsilimizdə nələri dəyişmək istərdiniz?

– “Təhsil Səfiri” olmaq müəllim olmaq qədər məsuliyyətli və eyni zamanda qürurludur. Nələrisə dəyişə bilsəm, ilk öncə məktəbi bitirmək üçün əsas fənlərdən imtahan olmasını istərdim. Şagirdlərimiz müəyyən qrup seçərək birtərəfli inkişaf edirlər, bu isə onların gələcək təhsil və şəxsi həyatlarında müəyyən çətinliklərə gətirib çıxarır.

“Təhsil Səfiri” olaraq ölkə təhsilinə hansı töhvələri verməyi düşünürsüz?

– Təhsil alanlarla yanaşı təhsil verənlərin inkişafına yönələn fəaliyyətlərlərlə öz işini və şagirdlərini sevən, kreativ, möhkəm əqidəli, pedaqogika və psixologiyanı dərindən bilən və pedaqoji fəaliyyətini daim inkişaf etdirən müəllim olmağa kömək etməyi düşünürəm.

Nəyi yaxşı bacarırsınız?

– Pozitiv mühit yaratmaq, idarəetmə və problem həll etmə, auditoriyanı inandırmaq və ələ almaq, İKT bacarıqları və həmçinin rəsm çəkmək bacarığım da vardır.

Ömrünüzün sonuna qədər həyata keçirmək istədiyiniz 3 əsas hədəfiniz nədir?

– Məktəb direktoru olmaq, xəyalımdakı kimya laboratoriyasına sahib olmaq və təcrübələrdən ibarət öz dilimizdə olan bir sayt yaratmaq.

Sizin həyat deviziniz:

– Çox sevdiyim bir deyim var “Yaxşı düşünək yaxşı olsun!”
Hər zaman pozitiv düşünüb dünyamızı olduğundan daha gözəl etmək mümkündür.